"Таң атпай батирдин ээси балдарыбыз менен кууп чыкты" деген келин боюнча үйдүн ээси түшүндүрмө берди

Бүгүн эртең менен Айгерим Иманалиева аттуу интернет колдонуучу "батирдин акчасын төлөй албай калып, үйдүн ээсине карантинге карабай көчөгө чыгарып салды" деген видеосун жүктөгөн.

Көп өтпөй ал жашаган батирдин кожоюну делген аялдын видеосу интернетке тарады. Видеодо сүйлөп жаткан аял аларды сүйлөшүлгөндөн көп адам батирге кирип жашагандыгына жана үйүндө ызы-чуу салышкандыгына байланыштуу чыгарганын айтып берет.

"Башында ал келин 2 балам жана сиңдим менен жашайм деп айткан. Бирок кийинчерээк апасы, дагы бир сиңдиси келип кошулду. Мурда күйөөм жок деген болчу, 2 күн мурун күйөөсү келди. Көпчүлүк болуп жашап жатышты. Кечээ түштөн кийин ызы-чуу болуп чыгышты, апасы, сиңдилери ызылдап эле калышты. Күйөөм чыкса, бизди сабап, телевизорду талкалашты деп айтышыптыр. Ошол үчүн мен айттым, ызы-чуунун кереги жок, баргыла дедим", - дейт үйдүн ээси.

Ал күйөөсү 74 жашта, өзү 67 жашта экенин кошумчалап, бул куракта бизге ызы-чуунун кереги жок деп кошумчалаган.