Ош шаарынын коменданты: "Испаниядан келген жаран обсервацияга жаткырылган, анын апасы көз жумганы чын"

Бүгүн, 12-апрелде Кара-Суу, Ноокат райондорунун жана Ош шаарынын коменданты Малик Нурдинов аталган аймактардагы абал тууралуу маалымат жыйын берди. Аталган жыйында ал жарандардын жана журналисттердин суроолоруна да жооп берди.

"Социалдык тармактарда Кара-Суу районунун Жар-Ооз айлында Испаниядан келген жаран коронавирус менен ооруп жатканын жашырган. Натыйжада оору апасына жугуп, ал көз жумган деген маалымат чынбы?" - деген суроо узатылды.

Малик Нурдинов аталган маалымат боюнча иликтөө жүрүп жатканын билдирди.

"Ооба. Испаниядан келген жаран ЖОЖдордун биринде жетекчилик кызматта иштейт экен. Ал чет элге окууга барып 1-мартта келген. Чет жакка барып келгенин жашырганбы же жокпу иликтөө көрсөтөт.

Ал эми апасы каза болгону анык. Куран окутууга 100-120дай киши барган. Алардын баардыгы көзөмөлгө алынган. Тегерек четиндеги көчөлөр дезинфекциядан өттү. Тергөө иштерин улантып жатабыз, эгер ооруну жашырганы аныкталса, мыйзам алдында жоопкерчилиги каралат.

Ал жигит азыр обсервацияда жатат. Анын коңшу көчөсүндөгүлөр кабатыр болбой эле койсо болот, бүт баары медицина жана укук коргоо органдарынын көзөмөлүнө алынды”,- деди Нурдинов.