"Элдин баары бизден качып жатышат". Кара-Суу районундагы ата-эне кызынын өлүмүнө дарыгерди күнөөлөп жатат

Бүгүн, 13-апрелде Ош шаары жана Ноокат, Кара-Суу райондорунун коменданты Малик Нурдинов онлайн маалымат жыйын берип, жашоочулардын суроолоруна жооп берди. Жыйын учурунда Кара-Суу районунун тургуну кызы медицина кызматкерлеринин шалаакылыгынан улам каза болуп калганын жана бул багытта медицина кызматкерлерине кандай чаралар көрүлө турганын сурап, бийлик өкүлүнө суроо салды.

"Кара-Суу районунун Папан айыл өкмөтүнүн тургуну болом. Айылдагы медицина кызматкерлери кызымдын дене табы 42ге жогорулап кетсе да карабай коюшкан. Ошол күнү анализинин жыйынтыгынан коронавирус аныкталган эмес. Тилекке каршы, кызыбыз каза болуп калды.

Иним менен келиним 9-апрель күнү обсервациядан үйгө чыгарылды. Элдин баары бизден качып жатышат. Келиним шаардык обсервацияда 14 күн жаткан. Иним менен келинимден коронавирустун белгилери аныкталган жок. Кызынын анализинен дагы коронавирус аныкталган эмес. Дарыгерлер анализдин жыйынтыгын тактабай, өздөрү дүрбөлөңгө түшүп, наристенин өлүмүнө себепкер болду. Медицина кызматкерлеринин бул аракетине баа берилеби?" деп суроо узатты жаран шаар комендантына.

Нурдинов алгач жаранга комендатуранын атынан көңүл айтып, төмөнкүдөй жооп узатты.

"Жергиликтүү медицина кызматкерлери антына бек турбай, кооптонуп, убагында тез жардам көрсөтпөсө, бизге арыз менен кайрылыңыз. Толук кандуу текшерип, жооп беребиз", - деди ал.