Сауд Арабияда аялына унитаздагы суудан кошуп чай демдеп берген блогер 5 жылга эркинен ажыратылышы мүмкүн же 800 миң доллар айып төлөйт

Сауд Арабияда Хани Халавани аттуу блогер аялы Алануд Яманиге унитаздагы суудан кошуп чай алып келип берген. Муну ал күлкүлүү тамаша катары эсептеп, интернетке жүктөгөнү жазылат чет элдик маалымат булактарында.

Видеодо көрүнгөндөй блогердин аялы чайды бир ууртап көрүп, кандайдыр бир шек санап жаткандай түр көрсөтүп, жанындагы адамга кружканы сунган. Ал да чайды жыттап, ууртап көрөт. Халавани жалбыз кошулган чай экендигине ынандырат.

Көп өтпөй эле Алануд Ямани күйөөсүнүн интернеттеги баракчасынан бул "тамашаны" көрөт. Дароо бул жакшы эмес көрүнүш экенин, муну балдар туурашы мүмкүн экендигин айтып өчүрүүнү талап кылган. Анткен менен жергиликтүү укук коргоо органдары видеону көрүүгө үлгүрүшкөн. Сауд Арабиядагы тартип боюнча социалдык тармактарды туура эмес багытка колдонууга катуу чаралар каралган. Мисалы, Халавани андагы мыйзам боюнча 5 жылга чейин эркинен ажыратылышы мүмкүн же 800 миң доллардай айыпка жыгылат. Полиция аны башка адамдардын коопсуздугуна шек жаратуу жана интернет тармактарын колдонуудагы эрежени бузган деп кармагандыгы жазылат маалыматта.