"Жалал-Абадда 20 сомдон сатылып жаткан картошканын баасы бир күндө 45 сомго көтөрүлдү" дешет тургундар

"Жалал-Абад шаары менен Сузакта азык-түлүктөр кымбаттап жатат, ундун баасы асман чапчыды, ал эми картошканын баасы 40 сомдон 45 сомго чейин көтөрүлдү. Ошондой эле базарда бир эле товар ар кандай баада сатылууда". Мындай маалыматты бүгүн, 13-апрелде аталган аймактардын жашоочулары өкмөткө караштуу монополияга каршы жөнгө салуу агенттигинин Жалал-Абад облусу боюнча жетекчиси Ниязбек Мойдиновго онлайн эфир учурунда билдиришип, суроо узатышкан.

"Базарда баалардын сөзсүз түрдө бирдей болушу шарт эмес. Ошондуктан ал жакта ар кандай баалар боло берет. Бирок монополияга каршы жөнгө салуу агенттигинин берген максималдуу баа чегинен ашпашы керек. Картошканын максималдуу баасы 40 сом деп белгиленген. Анын кымбатташынын себеби дүңүнөн саткандардын баалары кымбаттаганына байланыштуу", - деп жооп берди Ниязбек Мойдинов.