"Бет каптан башка эч нерсебиз жок". Баткенде үй-бүлөлүк медициналык борбордо иштеген дарыгер кайрылуу жасады

Баткен облусунун Лейлек районундагы үй-бүлөлүк медициналык борбордо иштеген дарыгер видео кайрылуу жасады. Анда ал 70 кызматкер иштеген ооруканага күнүгө бейтаптар келерин, бирок бир дагы дарыгердин коргонуучу каражаттары жок экенин айтат.

"Биздин ооруканага коронавирус аныкталган жарандар менен байланышта болгондор келип жатышат. Биз алардан кабар алабыз, андан башка дагы бейтаптарды кабыл алабыз. Бирок кызматкерлердин халатынан, бет кабынан башка эч кандай коргонуучу каражаттары жок.

Эгер бизге жардам берсеңиздер, 70 даана халат (бир жолу кийилүүчү), 70 даана антисептикалык каражат, 50 даана градусник, 350 даана бет кап жана 350 даана кол кап керек. Бул биздин бир күндүк керектөөбүз", - дейт дарыгер.

Коргонуучу каражаттардын жетишсиздиги боюнча Саламаттыкты сактоо министрлигинин Баткен облусу боюнча координатору Арзыбек Борубековго кайрылганыбызда, ал буларга токтолду.

"Медайымдын видео кайрылуусу боюнча кыска маалымат бере кетейин. Бүгүнкү күндө аталган ооруканада укол, тамчылатуучу систем, дене тапты түшүрүүчү дары-дармектер жетиштүү деңгээлде. Мындан тышкары коргонуучу костюмдар (бир жолу колдонулуучу 170 даана, көп жолу колдонулуучу 190 даана), 270 даана респираторлор, 700 даана бет кап бар. Өзбекстан тарабынан келген гуманитардык жардам Баткен облусунун бардык аймактарындагы ооруканаларга таратылды. Дагы Кытайдан гуманитардык жардам келүүсү күтүлүүдө. Облуста медициналык коргонуучу каражаттардын запасы бар, эгер зарылчылык болсо аны дагы таратып беребиз", - деди ал.

Бүгүнкү күндө Баткен облусу боюнча 5 жарандан коронавирус аныкталды.