Лейлек районунун акими: "Дарыгер видеону чет өлкөдөгү кыздарына жиберген"

Баткен облусунун Лейлек районундагы үй-бүлөлүк медициналык борбордо иштеген дарыгер Минавар Камилова видео кайрылууну Америкада жашаган кыздарынын өтүнүчү менен жасаган. Бул тууралуу SUPER.KG порталына Лейлек районунун акими Баймурат Бекмуратов билдирди.

Айтымында, дарыгер кайрылуусунун арты менен Америкадан жардам алуу максатын көздөгөн. Себеби алар ал жерде жашаган Кыргыз өлкөсүнүн жарандарынын коому аркылуу медициналык каражат негизинде жардам берүүнү каалашкан.

"Бул жаран Америка тараптан аларга жардам келип калсын деген максатта аларга видео тартып жиберген экен. Бизде бир аз кыйынчылык болуп жатат деп мындан 10 күн мурун кайрылуу жолдогону тууралуу дарыгер жеке өзү айтып берди. Дарыгер үйүнөн келип-кетип жеке кабинетте жарандарды кабыл алып иштегендиктен жардамдардан кабары жок болгондугун билдирди. Азыркы тапта бизде баары жетиштүү. Бизге жардамдар келип жатат, дарыгерлер керектүү каражаттар менен камсыздалган. Камилованын Америкадагы кыздары дагы жардам уюштурушуптур, ал жолдо келе жатыптыр", - деди Бекмуратов.

Эске салсак, буга чейин дарыгер тарабынан 70 кызматкер иштеген ооруканага күнүнө бейтаптар келерин, бирок бир дагы дарыгердин коргонуучу каражаттары жок экенин айткан видео тараган.