Казакстанда сутка ичинде 174 жарандан коронавирус аныкталып, анын 116сы медицина кызматкерлери экени айтылды

Тектеш кабарлар: Дүйнөгө тараган коронавирус боюнча башка маалыматтар (8923 материал)

Казакстанда сутка ичинде 174 жарандан коронавирус аныкталып, анын 116сы медицина кызматкерлери экени белгилүү болду. Бул тууралуу коңшу өлкөнүн Саламаттыкты сактоо министрлигинин коомдук саламаттыкты сактоо башкармалыгынын жетекчиси Тлеухан Абилдаев билдирди деп жазышат жергиликтүү басылмалар.

"Вирус аныкталган жарандардын ичинен 58и оорулуулардын жакындары, 110у Алматы шаарындагы борбордук клиникалык оорукананын кызматкерлери, бирөө балдардын инфекциялык клиникалык ооруканасынын кызматкери, экөө "Тез жардамдын", дагы үчөө ар кайсы бейтапканалардын кызматкерлери", - деп айтылат маалыматта.

Казакстанда медицина кызматкери вирус жуктуруп алган учур биринчи жолу 11-апрелде катталган. Учурда Алматы шаарындагы балдардын инфекциялык ооруканасы жана борбордук клиникалык ооруканасы жабылды.

14-апрелге карата Казакстанда ооругандардын саны 1 миң 179га жетип, анын 138и айыкты, 14ү каза болду.