Депутат саламаттыкты сактоо министрин УКМКдан, укук коргоо органдарынан коркпой, дарыгерлерди коргоого чакырды

Депутат Жанар Акаев саламаттыкты сактоо министри Сабиржан Абдикаримовду УКМКдан, укук коргоо органдарынан коркпой, дарыгерлерди коргоого чакырды. Бул тууралуу ал бүгүн, 14-апрелде Жогорку Кеңештин комитет жыйынында билдирди.

Эл өкүлү министрге аймактарды кыдырып, дарыгерлерге жолугуп турууну сунуштады.

“Өкмөт өкүлдөрү маалымат жыйынында тиешелүү акча которулду деп билдирген. Бирок медицина кызматкерлери азыркыга чейин ала элек. Алар күндө үмүт кылып банктык карточкаларын карап, күтүп жатышат. Баарыбызга белгилүү дарыгерлердин айлыгы аз, компенсация берилсе алар үчүн чоң колдоо болмок”, - деди депутат.

Министр 828 кызматкерге 6 миллион 600 миң сом каражат которулганын айтты. "Бүгүн, эртең баарына каражаттарды таратып бүтөбүз. Айрым эсептер так көрсөтүлбөгөндүктөн жана иштебеген адамдардын тизмеге кирип калгандыгына байланыштуу кайрадан каралып, март айыныкы бир аз кармалып калып жатат”, - деди министр.