Саламаттыкты сактоо уюму БЦЖны коронавируска каршы колдонуудан баш тарта турууга чакырды

Дүйнөлүк саламаттыкты сактоо уюму кургак учукка каршы колдонулуучу БЦЖ эмдөөнү (прививка) коронавирус менен каршы күрөшүүдө колдонбой турууга чакырды. Бул тууралуу уюмдун сайтында жарыяланды.

Маалыматка ылайык, азыркы тапта аталган вакцина коронавирус менен каршы күрөшүүдө кандай эффект берери тууралуу изилдөөлөрдүн так жыйынтыгы чыга элек.

"Азыркы тапта Бацилла Кальмет Герендин (БЦЖ) вакцинасы адамдарды коронавирустан коргойт деген так маалымат жок" деп жазылган маалыматта.

Азыркы тапта клиникалык сыноолор жүрүп жатат, алар вакцинанын коронавируска каршы күрөшүүдө жарактуубу же жокпу көрсөтөт.

Буга чейин вирусологдор мурунку СССР өлкөлөрүндө коронавирус менен жабыркагандардын саны башка өлкөлөргө салыштырмалуу аз экенин айтып чыгышкан. Ошондой эле алар бул балдар жаңы төрөлгөн кезде сайылуучу БЦЖ эмдөөсүнөн (прививка) улам экенин айтышкан. Дарыгерлер кургак учукка каршы сайылган вакцина коронавирус менен күрөшүүдө жардам бериши мүмкүн экендигин айтып, бирок аны кайталап колдонуу адамды кургак учук оорусуна алып келерин эскертишкен.