Рио-де-Жанейродогу Иса пайгамбардын айкелине медициналык халат кийгизилди

Бразилиянын Рио-де-Жанейро шаарындагы белгилүү Корковаду тоосунун үстүндө жайгашкан Иса пайгамбардын айкелине медициналык халат кийгизилди. Бул тууралуу чет элдик маалымат булактары жазып чыгышты.

Иса пайгамбардын айкелине убактылуу дарыгердин кийимин кийгизүү демилгеси дүйнө элинин ак халатчандарын колдоо иретинде жасалганы айтылат.

"Акциянын уюштуруучулары айкелдин астына 9 тилде: португалча, англисче, немисче, испанча, кытай тилинде, французча, италиянча, арабча жана орусча "рахмат" деген сөздү жазып ыраазычылык билдиришкен. Ошондой эле айкелге берилген жарык COVID-19 илдетинен көп жабыркаган өлкөлөрдүн желегинин түстөрүндө берилген. Аларга АКШ, Испания, Италия, Кытай жана Бразилия өлкөлөрү кирген", - деп айтылат маалыматта.

Бразилиядагы Иса пайгамбардын айкели дүйнөнүн жети кереметинин бири. Анын бийиктиги 38 метр, салмагы 635 тоннаны түзөт.