Комендант: "Дүкөнчүлөр деле адамгерчилик кылып, спирт ичимдиктерин 15 күн сатпай турса болот"

Бүгүн, 15-апрелде Кара-Суу, Ноокат райондорунун жана Ош шаарынын коменданты Малик Нурдинов жана саламаттыкты сактоо министринин орун басары Мадамин Каратаев аймактардагы абал тууралуу онлайн маалымат жыйын өткөрүштү.

Суроо: "Спирт ичимдиктерин сатууга тыюу салдыңыздар эле, аны көзөмөлдөө жагы кандай жүрүп жатат, сатуучуларга түшүндүрүү иштери жүргүзүлөбү?"

Комендант: "Бул биздин коомдо өзгөчө абал киргизилгенге чейин эле көйгөйлүү маселе болуп келген. Бардык жакта сергек жашоо деген принцип болуш керек. Өзгөчө абал киргенде эмне себептен мындай буйрук чыкты? Талдоо жүргүзгөндө мас абалында коменданттык саатты бузган, ички иштер орган кызматкерлерине баш ийбеген учурлар, экинчиден спирт ичимдигин ичип алып автоунаа айдаган учурлар катталды. Жол кырсыгынын айынан адам өлүмүнө алып келген окуялар орун алды. Ошондуктан дүкөн ээлеринен алкоголдук ичимдиктерди сатпай тургула деп суранам.

Биз сергек жашоого кадам ташташыбыз керек. Спирт ичимдигин ичкендер дагы башка адамдарды тартат, ал эми алар өз кезегинде ооруган адамдар менен байланышта болуп калышы мүмкүн. Ал эми бул ишти көзөмөлдөө боюнча экономикалык кылмыштарга каршы күрөшүү кызматына жана салык кызматына тапшырма берилди. Ошондой эле жергиликтүү ички иштер органы жана жергиликтүү бийлик дагы көзөмөл жүргүзөт. Дүкөндөр адамгерчилик кылып деле спирт ичимдиктерин 15 күн сатпай турса болот, андай болбосо мыйзам чегинде чара көрөбүз".