Дарыгерлердин коронавирусту жуктуруп алуу тобокелчилигин азайтуу максатында. Казакстанда вируска кабылгандарды дарылоочу госпиталь курулууда

Коңшу Казакстан коронавирустун күч алган мезгилине жеткенин айтып, жарандарды массалык түрдө тесттен өткөрүп баштады. Аталган өлкөдө коронавируска кабылгандарды дарылоо үчүн 200 орундуу госпиталь курулууда. Медициналык жайдын курулушу 17-апрелде аяктап, эксплуатацияга берилери күтүлүүдө.

Казак басылмаларынын маалыматына ылайык, госпиталь Нур-Султан шаарынан 10 чакырым алыс жерде жайгашкан. Бул жайды куруу менен оорулууларды дарылоонун натыйжалуулугу жогорулайт, медицина кызматкерлеринин вирусту жуктуруп алуу тобокелчилиги азаят деп айтылат маалыматта.

Учурда госпиталдын чатыры жабылып, ичине тиешелүү жабдыктарды орнотуу иштери жүргүзүлүп жатат. Иштин көлөмүнө жараша миңден ашуун жумушчулар тартылат. Курулуш жүрүп жаткан аймакта жумушчулардын коопсуздугу каралган, "Тез жардам" кызматы жана атайын дарыгерлер нөөмөттө турушат.

Казакстанда коронавирус менен ооругандардын жалпы саны 1 миң 362ге жетип, анын 277си илдеттен арылды. Каза болгондордун саны 17 адамды түздү.