Ош шаарынын коменданты: "Спирт ичимдиктерин сатууга тыюу салынсын деген буйрук жокко чыгарылды"

Бүгүн, 17- апрелде Кара-Суу, Ноокат райондорунун жана Ош шаарынын коменданты Малик Нурдиновдун катышуусунда кезектеги онлайн маалымат жыйыны өттү.

Жыйында 13-апрелде спирт ичимдиктерин сатууга тыюу салган буйрук кайра эмне себептен жокко чыгарылганы тууралуу суроо узатылды.

"13-апрелде чыккан буйрукту түзөтүү жана толуктоо максатында жокко чыгардык. Бул жергиликтүү бийликтер, депутаттар жана салык кызматы менен кеңеше турган, добуш менен чечиле турган иш экен.

Ошондуктан буйруктун айрым жерлерин такташып туруп, кайрадан карап чыгалы деген чечим кабыл алдык. Бирок спирт ичимдигин саткандарга эскертүү берилип жатат. Ошол жактагы элдин саламаттыгы үчүн жана үй-бүлөлүк зордук-зомбулуктун алдын алуу үчүн 14 күн чыдап, аны сатпай турушун айтып жатабыз", - деди комендант.