Комендант: "Нарынга Пакистандан вирус алып келген жаранга кылмыш иши козголгон. Ал таксинин айдоочусуна коронавирус жуктурганы аныкталды"

Нарынга Пакистандан келип, башкаларга оору жуктурган жаранга иш козголду. Бул тууралуу бүгүн, 17-апрелде комендант Уланбек Аалиев онлайн маалымат жыйында билдирди.

Жыйында "Пакистандан келген жаран жоопкерчиликке тартылабы? Аны менен таксиде чогуу келгендер эмне болду?" деген суроо узатылды.

"Бүгүнкү күндө Пакистандагы дааваттан келген жаранга кылмыш иши козголгон. Азыр бул адам айыгып, үй-бүлөсү менен бирге үй карантинине чыкты. Тергөө иши баштала элек. Анткени учурда дарыгерлер уруксат бере элек.

Аны менен таксиде бирге келгендердин ичинен, ошол унаанын айдоочусу гана ооруну жуктуруп алган. Учурда таксист үй-бүлөсү менен ооруканага жаткырылды", - деди Аалиев.

Нарын облусу боюнча жалпысынан 45 адам ооруга чалдыкса, анын ичинен мурда айыккан 2 жаранга дагы 2 жаран кошулуп илдеттен айыкты. Айыккандар бир үй-бүлө мүчөсү.