"Күйөөм камалып кетсе, бизди ким багат?". Баласын сабаган атанын аялы күйөөсүнүн камалышын каалабайт

Интернет желесине баласын сабаган атанын аялы менен чогуу бирге кечирим сураганын чагылдырган видео тарады. Анда баланы сабаган атанын аялы "бизге жардам бере турган киши жок" деп ыйлап, кечирим сураган.

"Менин атам жок, алар мени багып алышкан. Жолдошумдун апасы дагы кайтыш болуп калган. Кайнатам дагы эч жерде иштебейт жана бизге жардам бере турган да киши жок. Жолдошум камалып кетсе, мага эч ким жардам бере албайт. Ошондуктан кечирим сурайбыз, кечирип койгула", - деп билдирген ал видео кайрылууда.

Азыркы тапта да бул окуя коомчулук тарабынан кызуу кепке алынууда. Алар эки жээкке бөлүнүп, биринчи тарап атаны камалып, жазасын алсын десе, экинчи тарап эскертүү берүү жетиштүү деген пикирлерин билдирип жатышат. Буга чейин баланын ата-энеси суракка алынып, 4-перзентин күтүп жатышканы маалым болгон.

Кечээ, 17-апрелде интернет желелерине баланы "отжимание жаса" деп мажбурлап, баласын сабап жаткан эркек кишинин видеосу тараган. Видеодо ал баланы муунтканга чейин барган. Коомчулукта талкууну жараткан чуулу видео боюнча SUPER.KG порталы айрым маалыматтарды алган.

Көп өтпөй баланын тай тарабы окуя боюнча полиция кызматына кайрылганын билдирген. Андан соң баланын атасы кылган жоругуна өкүнүп жатканы тууралуу маалымат тараган. Ошону менен токтолуп калбай, байма-бай интернет булактарына ата-энесинин баласы менен урушпай, жакшы сүйлөшүп отурган видеолору чыгып жаткан.