"Жоругу чектен ашып камакка алынган". Анжелина Жолиге окшошом деп таанылган ирандык кыз коронавирус менен ооруп жатат

3 жыл мурун бир катар чет элдик маалымат булактары ирандык Фатима Хишванд аттуу кыз тууралуу жазышып, анын таң калычтуу сүрөттөрү да жарыяланган. Инстаграмда Сахар Табар деген ат менен белгилүү бул кызды анда Анжелина Жолиге окшошуу үчүн 50 жолу операция жасаткан деп жазышкан. Бирок Хишванд бул маалыматты четке кагып, ал жүзүнө пластикалык операция жасатканын, бирок анын саны 50 эмес экендигин, сүрөттөгү көрүнүш гримдин жардамында болгонун айтып чыккан. Ал өзүнүн социалдык тармактагы баракчасын активдүү жүргүзүп келчү. Бирок демейдегиден башкача сүрөт, видеолорду жарыялап жүргөн.

Ирандын укук коргоо органдары анын бул жоругун Кудайды мазактоо, элге жат көрүнүш менен акча табуу, жаш муунду жолдон адаштыруу, зомбулукка үндөө деп таап камакка алынган. Абакта Фатима Хишванда коронавирус инфекциясына чалдыкканын чет элдик басылмалар жазышууда.

Ага ылайык, ал учурда жасалма дем алдыруу аппаратынын жардамында дем алып жатат. Жактоочулары аны абактан чыгарууну өтүнгөнү менен сот бул өтүнүчтү четке каккан. Сот Хишванд коронавирусту жуктурган жерде керектүү дарылануудан өтөрүн белгилеген.

Фатима Хишванд абакка өткөн жылдын октябрь айында алынган.

Маалыматтар боюнча, Иранда 76 миңден ашык адам коронавирус жуктурган, каза болгондор 5 миңге жакын.