"Жасалма дем алдыруу аппаратына кошулду". Тажикстанда карантинде жаткан бейтаптын абалы оор экени айтылды

Тажикстандын Согдий облусундагы ооруканада карантинге алынып жаткан бир бейтаптын абалы оор экенин тажик басылмалары жазышууда.

Ага ылайык, 56 жаштагы Абдулхалил Журабаев 14-апрелде дене табы жогору болуп, 4 күн бою түшпөй койгондуктан ооруканага жаткырылган.

"Бейтаптын дене табы жогору болсо дагы үйдө жата берген. 14-апрелде түшкөн бейтаптын абалы эртеси күнү оорлошуп, дене табы жогорулап, кан басымы төмөндөп кеткен. Учурда ал жасалма дем алдыруу аппаратына кошулду. Дарыгердин айтуусу боюнча учурда бейтаптын абалы оор, анын үй-бүлөсүнүн 5 мүчөсү дагы карантинге жаткырылган. COVID-19га анализ тапшырышкан. Жыйынтыгы эртең чыгары күтүлүп жатат.

Айрымдар Журабаев 2020-жылдын 1-апрелинде каза тапкан Хабибулла Шодиев аттуу тууганын жерге берүү зыйнатына катышканын айтышкан. Мындан тышкары Журабаев маркумду жуунтуу процессинде да болгон. Расмий маалыматтар боюнча, маркум Хабибулла Шодиев эки тараптуу пневмония илдетинен улам көз жумган. Ал каза тапкандан кийин 11 дарыгер жана медайым, ошондой эле туугандары коронавируска анализ тапшырышкан", - деп айтылат маалыматта.

Маалым болгондой, Тажикстанда коронавирус жуктуруп алгандар жок экенин Бүткүл дүйнөлүк саламаттыкты сактоо уюму расмий тастыктап келет.