"Карантинде иштебеген дарыгерлерге каражат берүү токтотулат" деген буйрук боюнча министрлик билдирүү жасады

Интернетке карантинде иштебеген медицина тармагынын кызматкерлерине маяна берүү токтотулат деген саламаттыкты сактоо министринин буйругунун сүрөтү тарап, талкуу жаратты. Бул боюнча аталган министрликтин басма сөз кызматынан расмий билдирүү жасашты.

"Өлкөдөгү өзгөчө абал жана өзгөчө кырдаалга байланыштуу Саламаттыкты сактоо министрлигинин буйругу боюнча, коронавирус пандемиясы учурунда кооптуу делинген топко кирген (улуу курактагы, өнөкөт оорусу барлар, кош бойлуулар жана башкалар) жумушчуларды аныктоо, кадрларды кайрадан бөлүштүрүү жана саламаттыкты сактоо уюмунун жумушчуларынын санын мыйзам чегинде кыскартуу каралган. Ошондой эле үнөмдөлгөн маянаны кайрадан карап чыгып, өзгөчө кырдаал учурунда иштеп жаткан жумушчуларга бөлүштүрүп берүү каралган.

Мындан улам эпидемиологиялык абалга байланыштуу убактылуу иштебей калган кызматкерлерге айлык берүү боюнча Саламаттыкты сактоо министрлигинин буйругу 15-апрелде чыккан. Бирок келип чыккан айрым кемчиликтерден улам бул буйрук жокко чыгарылды. Учурда бул маселе Эмгек жана социалдык өнүктүрүү министрлиги менен биргеликте каралып, өкмөттүн долбоору даярдалып жатат. Бардык жагдайлар тиешелүү министрликтер жана ведомстволор менен кеңешип чечилет", - деп айтылат маалыматта.