Чет өлкөдөн келе албай жаткан кыргыздарга жардам берүү үчүн элчиликтерге канча каражат бөлүнгөнү айтылды

Чет өлкөдөн келе албай калган жарандарга жардам берүү үчүн тийиштүү кызматтарга каражат бөлүнүп берилди. Тагыраагы, Орусия жана Бириккен Араб Эмирликтериндеги Кыргыз өлкөсүнүн элчиликтерине акча бөлүнгөн. Мындай маалыматты биринчи вице-премьер-министр Кубатбек Боронов республикалык штабдын жыйынында билдиргенин өкмөттүн маалымат кызматынан кабарлашты.

"Учурда мекенине кайта албай жаткан чет өлкөдөгү мекендештерди колдоого алуу, алардын жашоосу үчүн убактылуу шарттарды түзүү, тамак-аш менен камсыздоо максатында Кыргыз өлкөсүнүн Бириккен Араб Эмирлигиндеги элчилигине 5 миллион сом, ал эми Орусиядагы элчиликке 10 миллион сом бөлүнгөн. Бул каражат жашоосунан жана тамак-аштан кыйналып турган кыргыздарга жардам берүүгө багытталды. Биздин дипломатиялык өкүлчүлүктөр мекендештер туш болгон маселелерди чечүүнүн үстүндө иштеп жатат", - деди биринчи вице-премьер-министр.

Ошондой эле Кубатбек Боронов тийиштүү кызматтар өз өмүрүн кыюу жана үй-бүлөдөгү зомбулуктун алдын алуу жаатындагы иштерге көңүл бурушу керектигин айтты.