Москвада 8 миңге чукул мигранттар салган жугуштуу оорулар ооруканасы колдонууга берилди

Москва шаарында бир ай аралыгында коронавирус менен ооруган бейтаптарды дарылоочу жугуштуу оорулар ооруканасы салынып бүтүп, алгачкы 20 бейтапты кабыл алды. Бул тууралуу орус басылмалары жазып чыгышты.

Оорукананын ачылышы 17-апрель күнү өтүп, мекеме В.П.Демихов атындагы №68 ооруканасынын курамына кирди. Жалпы аянты 40 гектар болгон аймакта 50 имарат курулган, ошондой эле медициналык кызматкерлер үчүн 14 секция жатакана бар. Оорукана 800 орунга ылайыкташкан, эгер бейтаптар көп болсо 900гө чейин кабыл алууга мүмкүн.

"Керек учурда ар бир орундун жанына медициналык газды алып келип, орнотконго ылайыкташкан. Ошондой эле орундар муктаждык жаралса жандандыруу бөлүмүндөгүдөй кылып өзгөртүп алууга болот", - дейт №68 оорукананын башкы дарыгери Сергей Переходов.

Эске салсак, аталган оорукананы салуу учурунда курулушчулар жаткан чатырча эки ирет өрттөнүп кеткен. Экинчи жолкусунда курулушта иштеген Кыргыз жараны каза болгон.