Президенттин басма сөз кызматынын жетекчиси премьер-министрдин отставкасы тууралуу жалган маалымат таратпоого чакырды

Президенттин басма сөз кызматынын жетекчиси Наргиза Мансурова мамлекеттик бийликтин бардык күчү коронавирус инфекциясы менен күрөшүүгө жумшалып жаткан учурда жалган маалымат таратпоого чакырды. Бул тууралуу бүгүн, 21-апрелде президенттик аппараттын басма сөз кызматынан билдиришти.

"Премьер-министрдин кызматтан кетиши жана өкмөт башчынын кызмат ордуна талапкер тандалышы мүмкүн экендиги тууралуу ар кандай ушак-айыңдарды таратпоого чакырабыз.

Учурда бардык мамлекеттик бийлик органдарынын күч аракеттери толугу менен коронавирус инфекциясынын жайылуусуна жана анын кесепеттерине каршы күрөшүүгө багытталган.

Буга окшогон ушак-айыңдар бирөөлөр аркылуу атайылап жасалып, акыркы күндөрдө жайылтылып жатат деп ойлойбуз.

Ошондуктан саясий чөйрөнү жана массалык маалымат каражаттарынын бардык болгон күч-кубатын мамлекеттик органдардын инфекцияга каршы күрөшүүсүнө жардам берүүгө багыттоого чакырабыз", - деп жазылат маалыматта.

Кечээ, 20-апрелде өкмөт башчынын басма сөз катчысы Адилет Султаналиев "премьер-министр отставкага кетти деген маалымат фейк" деп билдирген.