"Бала баккандан чарчап кеттим". Орусияда ыйлаганы үчүн ымыркайын аёосуз сабап салган аялдын видеосу тарады

Видеону жергиликтүү маалымат булактары жарыялап, окуя Орусиянын Оренбург облусунда болгонун жазды. Ага ылайык, аял баласын ыйлаганы үчүн сабаган.

Адегенде ал керебетте ыйлап жаткан баланы алып, сөгүнгөн сөздөр менен тилдей баштаган. Анда ал бала кароодон чарчап кеткенин, аны балдар үйүнө бере турганын айткан.

Баланын ыйы басылбаганда ал колунан аны диванга ыргытып, артына бир канча жолу урат. Андан кийин колуна алып кайра чапкылайт. Бул менен эле жөн калбай кайрадан диванды көздөй ыргыткан.

"Сенин айыңдан кийинки бала азап чегип жатат, акмак. Чарчадым, эч ким жардам бербейт, атаң кана?" - деген ачууланган аял ымыркайды тилдеп жатып. Бөлмөдө башка аял ага сүйлөп жатканы менен баланы сабаганын токтотууга аракет жасаган эмес. Видеону социалдык тармакка жүктөгөн адам баласын сабаган аялды көзөмөл кылуу өтүнүчү менен тиешелүү органдарга кайрылганын, бирок эч кандай жыйынтыктар чыкпай жатканынан видеону коомчулукка көрсөтүүнү чечкенин айткан.

"Эмнеге эч ким реакция жасабайт? Баланы апасы бир күнү өлтүрүп койсо, аларга жеңил болобу?" - деген ал.

Айрым басылмалар бул окуяны прокуратура териштирип жатканын, бала энесинен алынып ооруканага жаткырылганын жазышууда. Дагы башка маалыматтар боюнча, баласын сабаган аял 22 жашта, алар убактылуу башка үй-бүлөнүн үйүндө жашап жатышкан.

"Ал кайрадан кош бойлуу болуп калган. Келиндин үй-бүлөсүн өз үйүндө жашатып жаткандар анын баласына көп кыйкырып урушарын байкап жүрүшкөн. Бул жолу сени балдар үйүнө берем деп жемелеп жатканда тиешелүү мекемелерге чалып чакырышкан, бирок алар баланы алып кетишкен эмес", - деп жазылат анда.