Элмирбек Иманалиевди акыркы сапарга узатуу зыйнаты. Төкмө акын Азамат Болгонбаев: "Мен сизге шакирт катары да, өкүл бала катары да ыраазымын" (фото)

Бүгүн, 22-апрель күнү кыргыздын чыгаан төкмө акыны, Кыргыз Республикасынын Эл артисти Элмирбек Иманалиевди акыркы сапарга узатуу зыйнаты өтүүдө. Маркумдун шакирти, өкүл баласы Азамат Болгонбаев да устатын эскерип өттү.

"Кыргыз эли оор жоготууга учурады. Кечээ сүрөттөрүңүздү карап отурсам баарында күлүп түшүптүрсүз. Асмандагы күн сымал күлүп жашадыңыз. 2001-жылы сиз улуу өнөрдүн учугун улаган, мен такасыз эшилген бут кийимимди кийип, "Ош базарынан" алган жаман чапанымды жамынып алып сиз менен айтышкан айтышты бүгүн да эстеп отурам. Сиз Арстанбек, Токтогул, Тууганбай аталарыбыздын артынан кеттиңиз. Сизге өнөрдө шакирт да, турмушта өкүл бала да болдум. Устатым, замандашым, атам катары сизге ыраазымын! Кош болуңуз, атаке..." - деп сөзүн бүтүрдү Болгонбаев.