Элмирбек Иманалиевди дарыгерлер 1 сааттан ашык кабыл албай коюшту беле? Маркумдун шакирти Асылбек Маратов айткан сөзү боюнча түшүндүрмө берди

20-апрелде ак таңдай акын Элмирбек Иманалиев оорудан улам дүйнө салган. Ал эми кечээ, 21-апрелде жергиликтүү маалымат булактарынын бирине акын Элмирбек Иманалиевди Бишкектин ооруканалары карантинге байланыштуу кабыл албай, дарыгерлер алгачкы жардам көрсөткүчө бир сааттан ашык убакыт өтүп кеткенин акындын шакирти Асылбек Маратов билдирген.

"Кыргыз Республикасынын Президентинин жана Өкмөтүнүн Иш башкармасынын клиникалык ооруканасына алып барсак Фучик көчөсүндөгү №1 Шаардык клиникалык ооруканага жиберишти. Ал жакка барсак кайра атайын ооруканага жиберишти. Дарыгерлер "карантин маалы" деп кабыл албай өтө кечиктирип коюшту", - деген ал билдирүүсүндө.

Мындан улам SUPER.KG порталы маркум акындын шакирти Маратовдон бул маалымат боюнча комментарий алды. Анын айтымында, элге жарыяланып талкуу жаратып жаткан окуя такталбаган маалымат.

"Жан кашайып, кан жутуп турган маалда ушундай маалымат таркап кетиптир. Анткени ыза болуп турганда адам баласы пендечилик кылып, бирөөнү күнөөлөгүсү келет экен. Жеке өзүм устатымдын абалы начарлап, "Тез жардам" унаасы менен кеткенден кийин артынан барып калдым. Ал эми оорукана кызматкерлери бир жактан экинчи жакка жиберген деген такталбаган маалымат болуп калды. Элмирбек устатыбыз эмнеден өлдү десе, кайгыдан, сарсанаадан өлдү деп айтар элем. Анткени эгемендүүлүк алган жылдан бери өспөгөн өлкөнү "качан өнүгөбүз!" деп көп ойлочу. Апрель баатырлары тууралуу айтып жүрүп, өзү дагы апрель айында жан берди. Жалпы Кыргыз элиме терең кайгыруу менен көңүл айтам, орду толгус жоготуу", - деп билдирди ал.

Азыркы тапта бул маалымат боюнча маркум акындын кесиптештери, замандаштары жана жалпы эле эли эгер маалымат чын болсо дарыгерлер жоопко тартылышы керек деген талаптарын коюп жатышат.