"Кытыгылап ойноп койгом". Түптө 11 жана 12 жаштагы кыздарга 42 жаштагы жаран сексуалдык ыдык көрсөткөн деп шектелүүдө

Ысык-Көл облусунун Түп районунда 11 жана 12 жаштагы кыздарга 1978-жылы туулган жаран сексуалдык ыдык көрсөткөн деп шектелүүдө. Бул тууралуу облустук милициядан билдиришти.

Маалыматка ылайык, 20-апрель күнү 1983-жылы туулган аял милицияга кайрылган. Анда 1978-жылы туулган таанышы ичимдик ичип алып, үйүнө келип, анын эки кызына сексуалдык ыдык көрсөткөнүн айткан.

"Окуя болгон жерге барган милиция кызматкерлери кыздардын аты-жөнүн аныктаган. Ал эми ичимдик ичип алып, кыздарга ыдык көрсөттү делинген жаранды суракка алышкан. Суракта ал кыздарды кытыгылап ойноп, андан соң уктап калганын билдирген. Учурда кыздарга карата соттук-медициналык, психиатриялык экспертиза дайындалды. Алардын жыйынтыгы менен шектүү жарандын ишине юридикалык баа берилет. Ошондой эле бул факты Кылмыштардын жана жоруктардын бирдиктүү реестрине катталган", - деп билдиришти басма сөз кызматынан.