"Насыялар убактылуу төгүлбөй турганы айтылган, бирок бизди төлөгүлө деп жатышат". Улуттук банктын өкүлүнүн жообу

Бүгүн, 23-апрелде Жалал-Абад шаарынын жана Сузак районунун коменданты Жеңишбек Жоробеков өзгөчө абал кирген аймактардагы кырдаал боюнча маалымат берди. Ошол эле учурда банктар боюнча коомчулук тарабынан келген суроолорго Улуттук банктын Жалал-Абад облусундагы филиалынын жетекчиси Хусеин Акимбеков жооп берди.

Анда Улуттук банктын өкүлүнө жарандар тарабынан насыя акчаларына байланыштуу бир нече суроолор узатылды.

Суроо: "Өзгөчө абалга байланыштуу көптөгөн жеке ишкерлердин жумушу токтоп, салыктан баштап алган насыяларынын пайыздарын төлөй албай кыйналып жатышат. Мындай жагдайда ишкерлерге төлөө мөөнөтүн узартуулар каралганбы?".

Жооп: "Эгерде ошол ишкерлердин иши коронавируска байланыштуу токтоп калган болсо, насыяны төлөөнү банктар жекече карайт. Алар мөөнөтүн узартуу боюнча маселени чечет, бирок пайыздар баштагыдай эле кала берет".

Суроо: "Насыялар убактылуу төгүлбөйт деп айтылган. Бирок бизге "Айыл банктан" чалып жатышат. Алар туум кетет дешти, так маалымат берип коёсузбу?".

Жооп: "Азыр эле айтып кеткендей, коронавирус илдетинин айынан убагында төгүлбөй калган насыялык акчаларга төгүлбөй калган пайыздардын суммаларына эч кандай кошумча туум жана айып пулдар төлөнбөйт".