Орусиядан өлкөгө дагы 760 тонна буудай алып келинди

Орусиядан келишимдик негизде сатып алынган буудайдын экинчи партиясы Кыргыз Республикасынын аймагына жеткирилди. Бул тууралуу өкмөттүн басма сөз кызматынан билдиришти.

Маалыматка ылайык, бул жолу 11 вагон – 760 тонна дан эгини алып келинди.

"Жакынкы күндөрү өлкө аймагына дагы 53 вагон буудай жеткирилет. Мамлекеттик материалдык резервдер фонду Орусиядагы азык-түлүк корпорациясы менен 33 миң тонна буудай сатып алуу боюнча келишимге кол койгон. Бүгүнкү күндө анын 1800 тоннага жакыны келди.

Өкмөт тарабынан азык-түлүк коопсуздугун камсыз кылуу максатында сатып алынган буудайдын курамындагы белоктун көрсөткүчү жогору. Мамлекеттик материалдык резервдер фондунун кампаларында ун менен буудайдын кору жетиштүү. Өлкөдө ун жана дан азыктарына болгон таңкыстык жок", - деп жазылат маалыматта.