Президент Сооронбай Жээнбеков Орозо айынын башталышы менен куттуктады

Бүгүн, 23-апрелде президент Сооронбай Жээнбеков кыргыз элин Орозо айынын башталышы менен куттуктады. Бул тууралуу президенттик аппараттын басма сөз кызматынан билдиришти.

"Отуз күн кармаган Орозонун касиети менен дил дүйнөбүз тазарат, ыйманыбыз тереңдейт, аруу сезимдер арбып, жакшылыкка болгон үмүтүбүз бекемделет.

Коомдук биримдикке, улуттар арасындагы ынтымакка, бири-бирибизди колдоого чакырган Орозо күндөрүнүн мааниси - бүгүнкү татаал мезгилде өзгөчө бийик, ушул улуу касиеттер учурда бизге өтө зарыл.

Баарыңыздарга бекем ден соолук, бактылуу жашоо каалайм, жүрөктөрдө тынчтык орноп, аруу тилектердин орундалышын тилейм! Туткан Орозоңуздарды Кудайым кабыл кылсын! Жараткан Аллах элибизге ынтымак, жергебизге тынчтык берсин", - деп жазылат куттуктоодо.