Комендант Ат-Башы районундагы бейтаптардын абалы тууралуу айтты

Бүгүн, 24-апрелде Нарын шаарынын жана Ат-Башы районунун коменданты Уланбек Аалиев жана өзгөчө кырдаалдар министрлигинин Нарын облусундагы башкармалыгынын башчысынын орун басары Чолпонбек Боскончиев онлайн маалымат жыйын беришти.

Анда комендант кечээ, 23-апрелде облус аймагында оорунун очогу делинген Ат-Башы районуна барып, бейтаптардын абалы менен таанышканын айтты.

"Биз кечээ Ат-Башыга барып, блокпосттордо турган аскер кызматкерлери жана дарыгерлердин абалы менен таанышып, алардын жаткан жерлерин текшерип келдик. Дарыгерлер менен жолугушуп, бир канча маселелер айтылды. Ал эми бейтаптар тууралуу дарыгерлер менен сүйлөшкөндө, алар 55 илдет менен жабыркаган жаран дарыланып жатканын жана алардын абалы туруктуу экенин билдиришти", - деди комендант.