Кытай Түндүк Кореянын башчысынын ден соолугу боюнча айтылган кептерден улам адистер тобун жөнөттү

Түндүк Кореянын лидери Ким Чен Ынга жүрөк-кан тамыр ооруларынан улам жасалган операциядан кийин анын ден соолугу начарлап кеткени кабарланган. Буга байланыштуу Кытай бийлиги адистерден турган атайын топту Түндүк Кореяга жөнөттү. Бул тууралуу дүйнөлүк басылмалар өз булактарына шилтеме берип жазып чыгышты.

Медициналык адистерден турган атайын делегацияны Кытайдын Коммунисттик партиясынын эл аралык байланыш бөлүмүнүн өкүлү жетектеп, 23-апрелде Пекинден учуп кетишкени айтылат маалыматта. Ал эми сөз болуп жаткан эки өлкөнүн мамлекеттик тийиштүү мекемелери бул боюнча расмий билдирүү жасай элек.

Дүйнөлүк басылмалар Ким Чен Ындын ден соолугу начарлап кеткендиктен, анын ордун карындашы Ким Ё Чжон басышы мүмкүн экенин жазышууда. Себеби 2019-жылдын аягында Түндүк Кореянын Эмгек партиясынын Борбордук комитетинин пленумунда Ким Чен Ын күтүлбөгөн жерден каза болуп калса, бийлик анын карындашы Ким Ё Чжонго өткөрүлөт деген чечим кабыл алынган. Түндүк Кореянын лидеринин алмаштырчу айым тууралуу бул жактан окуңуз.