Орусияда карантинди 12-майга чейин узартуу сунушталды

Орусияда карантин убактысын 12-майга чейин узартуу сунушталды. Мындай демилгени "Микроб" илим изилдөө институтунун жетекчиси Владимир Кутырев көтөрүп чыккан. Бул тууралуу орусиялык басылмалар жазып чыгышты.

Маалыматка ылайык, мындай пикирин институт жетекчиси вице-премьер Татьяна Голикова менен өткөн жыйында айткан.

"Адистерде коронавирустан улам киргизилген изоляция режимин өлкөдө 12-майга чейин узартуу керек деген ой пайда болду. Бул жакшы жыйынтык көрсөтөт", - деген Кутырев.

Жыйындын соңунда вице-премьер чектөө чараларын узартуу боюнча сунушун президент жана өкмөт башчыга жеткирип барарын убадалаган.

Расмий маалыматтарга таянсак, Орусияда коронавирус жуктуруп алгандардын саны 68 миңден ашты. Анын ичинен 5 миңден ашыгы айыкса, 615и көз жумган.