Коронавирустун очогу болгон Ухан шаарында инфекция менен ооруган адам калган жок

Дүйнө элинин үшүн алган коронавирус пандемиясынын очогу болгон Кытайдын Хубэй провинциясындагы Ухан шаарындагы ооруканадан 12 адам чыгарылды. Муну менен аталган шаардагы ооруканаларда коронавирус менен ооруган бир дагы адам калган жок. Бул тууралуу чет элдик басылмалар жазышууда.

Кытайдын Гигиена жана саламаттыкты сактоо боюнча мамлекеттик комитетинин өкүлү Ми Фэнгдин айтымында, мындай натыйжага өлкөнүн бардык булуң-бурчунан ушул шаарга жиберилген дарыгерлердин талыкпаган эмгеги себеп болгон.

Буга чейин 24-апрелде Ухан шаарында коронавирус менен катуу ооруган акыркы адам айыгып чыкканы маалымдалган.

Коронавирус эң алгач Ухан шаарында 2019-жылдын декабрь айынын аягында катталган. Бул вирус Кытайдан тышкары дүйнөнүн башка өлкөлөрүнө кенен кулачын жайды. Март айында Бүткүл дүйнөлүк саламаттыкты сактоо уюму коронавирусту пандемия деп жарыялаган.