Карантинде отуруп көркөмүнө көз чаптыра албай калдыңызбы? Бишкектеги сулуу жаздын сүрөттөрүн көрүңүз (асмандан көрүнүшү)

Өлкөнүн айрым аймактарына өзгөчө абал, дагы башка региондорго өзгөчө кырдаал киргенинен бир айдан ашык убакыт өттү. Бул убакыт аралыгында адамдардын мурдагыдай эркин сейилдеп жүрүүсүнө коронавируска байланыштуу тыюу салынган. Бирок жаратылыш өз мыйзамдарын бузган жок, учурда жаздын эң көркөмдүү учуру. Көпчүлүк бул мезгилде сейил бактарда, жаратылыш койнунда эс алып, айлананын кооздугуна суктанчу. Бул жазда бир катар шаар, райондор менен катар Бишкекте да андай болгон жок. SUPER.KG порталы карантинде отурганда шаардын кандай өзгөргөнүнө көз чаптырды.

Көчөдө унаалар жүрүп жатканы менен сейил бактардан жашоочуларды дээрлик кезиктире албайсың. Ар бир сейил бакка кирерде тартип сакчылары текшерүүгө алышууда. Бишкектеги "Жеңиш" сейил багында сугатчы болуп иштеген Рыскелди Керимбердиевди кезиктирдик. Ал сейил бак эл жок болгонго караганда, элдин көптүгү менен көркөмдүү болчу дейт.

"Эл карантинде отурат, бирок биз демейдегидей эле жумуштабыз. Иштебей койсок, бак-дарактын баары саргайып, куурап калат. Азыр сейил бак эң кооз учуруна келди, аттиң, ушул учурда эл келип, эс алса кана деп калам. Бирок аман-эсен карантинден чыгып алсак, башкы жеңишибиз ошол", - деди ал.