Тажикстанда 136 медицина кызматкери пневмония илдети менен ооруканага жаткырылды

Дүйшөмбү шаарында 136 медицина кызматкери пневмония илдети менен ооруканага жаткырылды. Бул тууралуу чет элдик маалымат каражаттары жазып чыгышты.

Маалыматка ылайык, №1 шаардык медициналык борборуна жалпы 319 адам пневмония оорусу менен жаткырылган, алардын ичинен 136сы медицина кызматкери. 26-апрелде 107 адам сакайып ооруканадан чыккан, ал эми 11 адам оорудан көз жумган, дагы 8 адам оор абалда жандандыруу бөлүмүндө жатат.

Өткөн аптада ушул эле ооруканада бир нече адам пневмониядан көз жумганы кабарланган. Ал эми 22-апрель күнү ушул эле борбордо 4 бейтап каза болгон. 23-апрелде дагы 3 адам пневмониядан каза болгонун медициналык борбордун жетекчиси билдирген.

Ал эми 24-апрель күнү 57 жаштагы дарыгер Фатто Солиев каза болгону маалымдалган.

Айта кетсек, ушул күнгө чейин Тажик бийлиги өлкөдө коронавирус илдети каттала элек деген маалымат берип келет, буга карабастан чет элдик маалымат каражаттары жана айрым окумуштуулар өлкөдө адамдар пневмониядан эмес, дал ошол коронавирустук инфекциядан көз жумуп жатканын айтышууда.