"Бүгүн түнү блокпосттордун бардыгы алынат" дейт ички иштер министри

Депутат Дастан Бекешев Бишкекте блокпосттор качан алына турганын сурады. Бул тууралуу ал бүгүн, 30-апрелде Жогорку Кеңештин жыйынында билдирди.

Ички иштер министри Кашкар Жунушалиев президенттин жарылыгында бул тууралуу айтылганын эскертти. Анын айтымында, 1-майдан тарта блокпосттордун бардыгы алынып, жөө жана авто патрулдар калат.

"Эртеңден баштап таксисттер иштеп башташат. Таксисттер электрондук өткөрмө уруксат кагазын алганга жетишпей калышат", - деди депутат.

Бишкек шаарынын коменданты Алмазбек Орозалиев бул боюнча бүгүн өкмөттө жыйын болгонун айтты. "Санитардык эпидемиялык нормаларды сактагандарга электрондук уруксат беребиз. Билдирүүнү толтуруу үчүн жарым мүнөт кетет. Талаптарга жооп бергендерге электрондук уруксат кагазы берилет", - деди Орозалиев.