Депутат Масалиев укук коргоо органдарынын кызматкерлерине кошумча акыны берүү керектигин айтты

Депутат Исхак Масалиев укук коргоо органдарынын кызматкерлерине кошумча акыны берүү керектигин айтты. Бул тууралуу ал бүгүн, 30-апрелде Жогорку Кеңештин жыйынында билдирди.

"Бажы кызматы менен Салык кызматы март-апрель айларында 13 миллиард сом жыйнаган. Андан тышкары эл аралык каржы уюмдарынан 123 миллион доллар келген. Эми акча жок деп жатасыңар. Бүгүнкү күнгө чейин медицина тармагына бир аз каражат төлөндү. Милиция кызматкерлерине бир тыйын төлөнө элек. Бир айдан ашык убакыттан бери милиция кызматкерлери, аскерлер көчөдө күнү-түнү турушат. Алар акчадан баш тартпаш керек, бала-чакасы бар, багыш керек", - деди Масалиев.

Буга чейин жыйында премьер-министр Мухаммедкалый Абылгазиев укук коргоо органдарынын кызматкерлери айлыгын үч эсе көп алышы керектигин белгилеген. Бирок алар бюджетке оорчулук болуп жатса, албай эле коёлу деп жатышканын билдирген.