Акын, журналист Зайырбек Ажыматовду акыркы сапарга узатуу зыйнаты өтүп жатат

Бүгүн, 1-майда Бишкек шаарынын Дордой конушунда белгилүү акын, журналист Зайырбек Ажыматовду акыркы сапарга узатуу зыйнаты өтүп жатат.

Акыркы сапарга узатуу зыйнатына 100дөн ашуун киши келди. Алар акындын туугандары жана маданият өкүлдөрү.

Акын жана журналист Зайырбек Ажыматов 43 жашында каза болду. Ал бир айдан кийин 44кө чыкмак.

Зайырбек Ажыматов 1976-жылы 27-майда Аксы районунун Ак-Жол айылында төрөлгөн. 1993-жылы айылдык орто мектепти, 1998-жылы Жусуп Баласагын атындагы Кыргыз улуттук университетинин журналистика факультетин аяктаган.

"Жалгыздык" (1996-жыл), "Мелмил" (2005-жыл), "Нөлү көп жылдар" (2011-жыл) ыр жыйнактарынын автору.

Журналистикадагы эмгек жолун 1998-жылы "Асаба" гезитинен баштап, "Кыргыз Туусу", "Бишкек таймс" гезиттеринде, КТРКнын радио тармагында, "Жаңы Агым" гезитинде иштеп, акыркы жылдары "Азаттык" үналгысында иштеп жүргөн.