Исфана шаарында сел жүрдү (фото, видео)

Баткен облусунун Исфана шаарында бүгүн, 2-майда сел жүрдү. Бул тууралуу ӨКМнын басма сөз кызматынан билдиришти.

Маалыматка ылайык, 2-май күнү саат 18:30дар чамасында Лейлек районунун Исфана шаарында жаап өткөн мөндүрдүн кесепетинен Восточный көчөсүндө жайгашкан турак үйлөрдүн короолорун суу каптап жаткандыгы тууралуу маалымат түшкөн.

Жерине саат 19:00дө ӨКМнын Лейлек райондук бөлүмүнөн 3 кызматкер чыгып кеткен.

"Министр Замирбек Аскаровдун тапшырмасы менен Лейлек районуна министрдин орун басары Равшан Рысбаев жетектеген ыкчам топ жөнөп кетти. Министр абалды жеке көзөмөлүнө алды. Кошумча маалымат берилет", - деп жазылат маалыматта.