Коронавирустан каза болгон дарыгер 30 жылдан ашуун медицина тармагында иштеген

Бүгүн, 3-май күнү Саламаттыкты сактоо министрлигинин коомдук саламаттыкты сактоо башкармалыгынын башчысы Айнура Акматова жана Вирустарды көзөмөлдөө боюнча республикалык илимий борбордун жетекчиси Зуридин Нурматов өлкөдөгү эпидемиологиялык абал боюнча брифинг өткөрүштү.

Акматова статистика берүү оор болуп жатканын айтып, брифингди баштады.

"Коронавирустан каза болгон кесиптешибиз, №3 үй-бүлөлүк медицина борборунун дарыгерлер тобунун жетекчиси Жүзүмкан Көкүмбаеванын жакындарына, үй-бүлөсүнө көңүл айтып кетүүгө уруксат бериңиздер. Ал 1962-жылы Кочкор районунда туулган, 30 жылдан ашуун медицина тармагында иштеген. Саламаттыкты сактоо системинин отличниги болгон. Өз ишин мыкты билген адис катары жашап өттү", - дейт Акматова.

Кечээ, 2-майда эки бейтап (бири Жалал-Абад облусунун тургуну, экинчиси №3 үй-бүлөлүк медицина борборунун кызматкери) каза болгону маалымдалган.