"Коронавирустун белгилери байкалбаган бейтаптарды жайгаштырса болот". "Манас" аэропортунда бир мезгилде 670 адамды кабыл алуучу жай даярдалды

Биринчи вице-премьер-министр Кубатбек Боронов, президенттик аппарат жетекчисинин биринчи орун басары Алмаз Кененбаев мурдагы "Манас" транзиттик ташуулар борборунун аймагында обсервациялык пункттарды даярдоонун жүрүшү менен таанышты.

"Өлкөнүн Коопсуздук кеңешинин чечимине ылайык, болжол менен 670 адамды жайгаштырууга эсептелген 6 корпусту оңдоо иштери жүргүзүлдү. Палаталар бардык тиешелүү жабдыктар менен жабдылган жана санитардык-эпидемиологиялык талаптарга жооп берет. Бул имараттарды обсервация катары пайдаланууга болот, ошондой эле аларга оорусу жеңил өтүп жаткан же тиешелүү медициналык көзөмөл үчүн илдеттин белгилери билинбеген бейтаптарды жайгаштырса болот", - деди Кубатбек Боронов.

Эки адамга эсептелген ар бир палатада душ жана ысык тамак берүү үчүн атайын терезелер бар. Мындан тышкары медициналык кызматкерлер үчүн атайын имараттар каралган.

Биринчи вице-премьер-министр белгилегендей, аталган объектилер оорулуулардын жана медициналык кызматкерлердин, тийиштүү персоналдардын коопсуз жана ыңгайлуу иш алып баруусу үчүн бардык талаптарга жооп бериши шарт.