Исфанадагы селдин кесепетинен келтирилген зыяндын көлөмү 69 миллион сомду түзүшү мүмкүн

Алдын ала эсептөөлөр боюнча, Исфанада жүргөн селдин кесепетинен келтирилген зыяндын көлөмү 69 миллион сомду түзөт. Бул тууралуу өкмөттүн басма сөз кызматынан билдиришти.

Ага ылайык, вице-премьер-министр Акрам Мадумаров Баткен облусундагы иш сапарында Исфана шаарындагы, Тогуз-Булак, Сумбула айыл аймактарындагы суу каптаган бир нече объектти кыдырды. Ал ошондой эле селдин кесепетинен зыянга учураган турак жайларды жана инфраструктуралык объекттерди көрүп чыкты.

"Вице-премьер-министр жарандарга тийиштүү жардамдарды көрсөтүү, жаратылыш кырсыгынын кесепеттерин жоюу жана өзгөчө кырдаалдарда чара көрүүнүн алкагында алдын алуу иш-чараларын көрүү боюнча бир катар тапшырмаларды берди. Жергиликтүү бийлик органдарына калк арасында турак жайды камсыздандыруу боюнча иштерди күчөтүүнү милдеттендирди", - деп жазылат маалыматта.