Соң-Көлдө өткөн курултайдын максаты - элдин реакциясын билүү болгону айтылды

“24-августта Соң-Көлдө өткөн жаштардын курултайы мониторинг катары уюштурулду. Аны “Кумтөр” үчүн бийликке каршы канча киши чогуларын билүү максатында уюштурганбыз”,- деди буга чейин оппозиция менен иштешип келген Эрланбек Өмүралиев. Сүйлөшүүнүн жүрүшү УКМК тарабынан жашыруун видеокамерага тартылып, ал бүгүн 2-сентябрда телеканалдарда жарыяланды. Өмүралиев оппозицияны сатып кеткенин, бирок элдин тагдыры үчүн ушул жолду тандаганын айтты. “Соң-Көлдөгү курултайды "Садыр Жапаров каржылады" дегем, бирок акчаны “Бүткүл Кыргызстан” саясий партиясынын лидери Чыңгыз Капаровдон алгам. Жалпы-жонунан курултайды өткөрүүгө 320 миң сом жумшалды. Мониторинг жүргүзүүнүн максаты - элдин реакциясын билүү болгон. Эгер эл көп чогулса, мындан да чоң акция уюштурулмак”,- деди ал. Белгилей кетсек, Нарын облусунда 24-августта өткөн жаштардын курултайына 200дөй адам чогулган. Өмүралиев буга чейин оппозиция менен бирге иштеп май-июнь айындагы Жети-Өгүздөгү митингдердин активдүү катышуучусу болгон. Бирок ал оппозиция менен иштешүүдөн баш тартканын айтууда.