Жалал-Абадда сел жүрүшү мүмкүн делген кооптуу жерлерден жашоочулар көчүрүлүп жатат

Жалал-Абад облусунда сел жүрөт деген кооптуу жерлерден эл көчүрүлүп жатат. Бул тууралуу бүгүн, 4-майда өкмөттүн Жалал-Абад облусундагы ыйгарым укуктуу өкүлү Нурболот Мирзахмедов онлайн маалымат жыйын учурунда айтты.

Ал облус аймагындагы кооптуу делген аймактарды атап, андагы жашоочуларды көчүрүп чыгаруу иштери жүрүп жатканын билдирди.

"Кооптуу аймакта жашаган райондор - бул Сузак жана Аксы болуп жатат. Сузакта элди кооптуу делинген жерлерден көчүрүп чыгаруу иштери жергиликтүү бийлик тарабынан жүргүзүлүүдө. Эл кооптуу аймактардан атайын тигилген чатырларга көчүрүлүп чыгарылды. Ошол эле кезде элге түшүндүрүү иштери жүргүзүлүп, тууган-туушкандарынын үйлөрүнө көчүрүү боюнча дагы сунуштар берилген. Жаан-чачындын көп жаашына байланыштуу кооптуу делинген аймакка мониторинг жүргүзүлгөн", - деди өкүл.