"1-майдан тарта кыймыл көбөйүп кеткенине байланыштуу көзөмөл кайра күчөтүлөт" дейт өкмөттүн Нарын облусундагы өкүлү

Бүгүн, 4-майда Нарын облусундагы өкмөттүн ыйгарым укуктуу өкүлү Эмилбек Алымкулов облустагы эпидемиологиялык абал тууралуу маалымат берди.

Буга чейин Нарын шаары боюнча өзгөчө абал киргизилип, ал 30-апрелде аяктаган. Бирок Ат-Башы районундагы абалга байланыштуу ал 11-майга чейин узартылган.

Эмилбек Алымкуловдун билдиргенине ылайык, Нарын облусу боюнча жана шаардын ичинде 1-майдан тарта кыймыл көбөйүп, элдин сыртка көп чыгуусу байкалган. Мындан улам Нарын облусундагы 3 пост өзүнүн ишин уланткан.

"Учурда Нарын облусу боюнча 3 пост иштеп жатат. Кочкор районунда “Сары-Чат”, Жумгал районунда “Арал”, Ак-Талаа районунда “Актал-Чат” тосмолору. Аймактарга кирүүгө катуу көзөмөл жүргүзүлүп жаткандыктан, эгерде жарандарда негиздүү себеп болбосо, аларды киргизишпейт", - деп билдирди Эмилбек Алымкулов.

Ошондой эле аталган посттордо 1-майдан тарта ондогон транспорт зарыл себептери болбогондуктан, кайра артка кайтарылган жана облус боюнча санитардык эрежелерди сактоо боюнча көзөмөл күчөтүлгөн.