Өткөн суткада Республикалык жугуштуу оорулар клиникалык ооруканасында коронавирустан 69 жаштагы 1 бейтап каза болду (видео, хронология)

Кыргыз өлкөсүндөгү ооруну жуктуруунун себептери жана булактары жөнүндөгү суроого: "Коронавирус жуктуруп алуунун көпчүлүгү байланышта болгон жактардан аныкталып жатат. Ошондуктан биз бардык байланышта болгондорду аныктоого аракет кылып, көзөмөлдөп жатабыз, мындай учурда бизге кээде атайын кызматтар жардам беришүүдө”, - деп жооп берди саламаттыкты сактоо министринин орун басары Үсөнбаев.

Вирус организмде, канда өрчүйт. Колдон келсе ортодогу аралыкты сакташ керек.

5-майга карата өлкөдө вирус жуктургандардын жалпы саны 843кө жетти.
Стационарда – 232, алардын ичинен жандандыруу бөлүмүндө бешөө жатат.
Ооруканадан 600 адам чыгарылды.
Каза болгондордун саны 11.

"Режимди  туура сактап, бир аз чыдап турсак биз ооруну жеңебиз. Бирок азыр адамдар көчөгө чыгып алышты. Биз бири-бирибизди ойлоп, колдон келсе жумушубуз болбосо, көчөгө чыкпай койгонубуз оң. Азыр эрежелерди туура сактоо менен биз эпидемиологиялык абалды кармап, сактап кала алабыз", - деди Үсөнбаев онлайн маалымат жыйында. 

"Эпидемиологиялык көзөмөл бир калыпта кетип жатат. Бара-бара оору кетет. Биз бардык ооруган адамдар менен байланышта болгондорду таап, анализдерди алып жатабыз", - деди министрдин орун басары.

Өткөн сутка ичинде Бишкектеги Республикалык жугуштуу оорулар клиникалык ооруканасында COVID-19 вирусунан 69 жаштагы 1 бейтап каза болду.

"Анда ошондой эле пневмония, үчүнчү даражадагы курч мүнөздөгү дем жетишсиздиги жана баш мээсинде шишик диагнозу болгон. Мындан тышкары бейтап кант диабетинен жабыркап, инсулин алчу", - деп билдирди саламаттыкты сактоо министринин орун басары Нурболот Үсөнбаев.

Бир сутка ичинде өлкө боюнча Нарын облусунда 1 медициналык кызматкер коронавирус жуктуруп алды.
Жалпысынан республика боюнча COVID-19 диагнозу менен жабыркаган медициналык кызматкерлердин саны  217ге өстү. 150 медкызматкер стационарлардан айыгып чыккан.

Бүгүн, 5-майга карата республика боюнча СOVID-19 инфекциясынын 13 адам жуктуруп алды. Алар:
Бишкек шаары - 8;
Нарын облусу - 5.
Жалпы - 843.

Бир сутка ичинде 25 бейтап ооруканадан айыгып чыкты. Алар:

Ош шаары - 18;
Ош облусу - 3;
Нарын облусу - 2;
Бишкек шаары - 2.