"Мен олтурам сөрүдө". Элди жылмайткан позитив видеону тараткан келин жеңесинен кечирим сурайт

Мындан 2-3 күн мурун "мен олтурам сөрүдө" деп тамашалуу сүйлөп, видео тарткан жарандын видеосу социалдык тармакка тараган. Ал видео интернет бетине жайгашары менен аны бөлүшүп, жакшы пикирлерин калтырган жарандар көп болгон. Аны бөлүшкөндөрдүн катарында Учкунбек Токторбаев аттуу жаран бар болчу. Ага 6-майда видеону баракчасынан өчүрүп коюуну талап кылып, жарандын туугандары байланышка чыккан. Бул тууралуу Токторбаев SUPER.KG порталына айтып берди.

Айтымында, видеодогу адам азыркы тапта депрессия абалында жана ал видеонун коомчулукка тарап кеткенин каалаган эмес.

Маалыматка ылайык, видеодогу жаран Ноокат районундагы айылдардын биринде жашайт. Атын атагысы келбеген айылдашынын айтымында, ал абдан кичи пейил, кадыр-барктуу болгон айылдын сүйкүмдүү, камкор келини. Келин видеону коңшуларына эле жиберген. Ал видеонун интернетке жайылып кетүүсүн такыр ойлогон эмес.

"Азыр интернет деген балээ чыгыптыр, сүйлөсөң эле тарап кетет экен. Бул видео негизи сыртка чыкпай, өз ара ичибизде эле калышы керек эле. Ал биздин эң тамашакөй, сүйкүмдүү коңшубуз. Кээ бир жазылган терс комментарийлер коңшубузга кыпындай да тиешеси жок. Ал аруу, таза, тамашакөй жан", - дейт ал.

Ал эми видеодогу жарандын келини видеонун тарап кеткенине ал себепчи экенин айтып, андан кечирим сурады. Айтымында, ал видеону WhatsApp'тагы тайпалардын бирине жиберип, андан улам видео интернетке чыгып кеткен.

"Блогерлер, видеону өчүрүп салышыңарды суранам. Азыркы тапта бул видео коомчулукта катуу талкуу болуп жатат. Жеңем азыркы учурда жаман акыбалда. Видеодогу адам менин жеңем болчу. Өзүбүздүн коңшуларыбыздын арасындагы видеону мен бир тайпага таратып койдум эле, ошондон интернетке чыгып кетиптир. Жеңемден кечирим сураймын", - дейт ал.