Эл аралык валюта фонду Тажикстанга 189 миллион доллардан ашык акча бөлөт

Эл аралык валюта фондунун Аткаруу кеңеши 6-майда Тажикстанга 189 миллион 500 миң долларды бат насыялоо механизми аркылуу бөлүү тууралуу чечимин кабыл алды. Бул тууралуу фонддун сайтында жарыяланды.

Маалыматка ылайык, аталган каражат коронавируска байланыштуу чыгымдарды жабууга жумшалат.

"Пандемия Тажикстанга гуманитардык жана экономикалык чыгым алып келүүдө. Өлкөдөгү макроэкономикалык туруктуулукту сактап калуу максатында расмий органдар саламаттыкты сактоого, калктын аярлуу катмарын жана ишкерлерди колдоого каражат бөлүүнү көбөйтүү үчүн ар кандай чараларды көрүп жатышат", - деп жазылат маалыматта.

Фонд көрсөтүлгөн жардам экономиканын жана адамдардын пандемиядан олуттуу жабыр тартышынан сактап калат деп эсептейт.

Эл аралык валюта фонду коронавирус инфекциясына каршы күрөшүү үчүн Кыргыз өлкөсүнө 120 миллион 900 миң доллар бөлгөн.