"Уулу тирүүлөй көмүп салган". Кытайда уулу көмүп салган энени 3 күндөн кийин казып чыгышты

Кытайдын Шэньси провинциясында уулу тирүүлөй көмүп салган аялды 3 күндөн соң таап чыгышкан. Бул тууралуу чет элдик басылмалар жазып чыгышты.

5-майда 79 жаштагы кайненеси жоголуп кеткени тууралуу айтып келини полиция кызматына кайрылган. Анын айтымында, 2-май күнү күйөөсү апасын арабага салып бир жакка алып кеткен. Эртеси жалгыз келген күйөөсү апасын туугандарына алып барганын билдирген.

Сурак учурунда баласы өз энесин көрүстөнгө алып барып, каралбай калган күмбөзгө таштап, үстүн топурак менен көмүп салганын моюнуна алган. Энесинин эки буту тең баса албагандыктан, өз алдынча чыга албай калган.

Полиция кызматкерлери кылмышка шектүү айткан дарекке барышканда жер астынан бирөөнүн кыйкырыгын угушкан. Жерди казып киришкенде уулу көмүп салган аялды табышкан. Учурда аял ооруканада, абалы туруктуу деп бааланууда. Ал эми уулу "адам өмүрүнө кол салуу" беренеси менен шектелип жатат.