Тамада Эрнест Бөрүбаев: "Жардам сураган аялдарга чалып, "төшөккө макул болсоң, жардам берем" деген эркектер болуп жатат"

Коронавирус эпидемиясынан улам жумушсуз калган, жашоо-шарты начар адамдарга эки айдан бери жардам көрсөтүп келе жаткан тамада, жакында гана эмгек жана социалдык өнүктүрүү министринин коомдук кеңешчи болуп дайындалган Эрнест Бөрүбаев кечээ жагымсыз окуяга туш болгонун билдирди. "Бирөөлөр соопчулук кылып жүрүшөт. Бирөөлөр мекеним деп жүрүшөт. А кээ бирөлөр акмактык кылып жүрүшөт. Эмне деген эле заман болуп жатат өзү?" деп бир аял менен сүйлөшүүсү тиркелген видеону Инстаграм баракчасына киргизген.

Видеодо Эрнест мырзанын баракчасына жалгыз бой аял баласынын дарысына деп жардам сурап кайрылганын айткан. "Баламдын талмасы бар, кеч киргенде оозу, мурдунан кан чыгып, ооруп баштайт. Өзүм жалгыз бой эне болгондуктан, иштеген ишим жок, балама дарыга акча таппай, жардам сураган болчумун. Сиздин баракчаңызга жардам сурап кайрылгандан кийин бир эмес, 5 эркек киши чалып, төшөк жаатында кандайсың? Эгер макул десең, балаңа дарысын төлөп берейин" деп сунушташты", - дейт жалгыз бой аял.

SUPER.KG порталы Эрнест мырзага байланышып, окуя тууралуу кыскача маалымат алды. "Тилекке каршы, буга окшогон окуялар менин тажрыйбамда көп катталып жатат. Жалгыз бой келиндин окуясын жазгандан кийин бир нече жардам сурап кайрылган аялдарга ошондой жаатта "төшөккө макул болсоң, жардам берем" деп кайрылгандар көп экен. Аны мен башкаларга сабак болсун деген ойдо чыгардым. Жардам берет элем деп мага кайрылгандардын 80 пайызы аялдар, 20 пайызы гана эркектер болуп жатат. Бул аябай өкүнүчтүү", - дейт Эрнест мырза.